Andreas Gryphius

Vanitas! Vanitatum Vanitas!

1. Die Herrlikeit der Erden
2. Mus rauch undt aschen werden/
3. Kein fels/ kein ärtz kan stehn.
4. Dis was vns kan ergetzen/
5. Was wir für ewig schätzen/
6. Wirdt als ein leichter traum vergehn.

   
   

7. Was sindt doch alle sachen/
8. Die vns ein hertze machen/
9. Als schlechte nichtikeit?
10. Waß ist der Menschen leben/
11. Der immer vmb mus schweben/
12. Als eine phantasie der zeit.

    
    

13. Der ruhm nach dem wir trachtẽ/
14. Den wir vnsterblich achten/
15. Ist nur ein falscher wahn.
16. So baldt der geist gewichen:
17. Vnd dieser mundt erblichen:
18. Fragt keiner/ was man hier gethan.

    
    

19. Es hilfft kein weises wissen/
20. Wir werden hingerissen/
21. Ohn einen vnterscheidt/
22. Was nützt der schlösser menge/
23. Dem hie die Welt zu enge/
24. Dem wird ein enges grab zu weitt.

    
    

25. Dis alles wirdt zerrinnen/
26. Was müh' vnd fleis gewinnen
27. Vndt sawrer schweis erwirbt:
28. Was Menschen hier besitzen/
29. Kan für den todt nicht nützen/
30. Dis alles stirbt vns/ wen man stirbt.

    
    

31. Was sindt die kurtzen frewden/
32. Die stets/ ach! leidt/ vnd leiden/
33. Vnd hertzens angst beschwert.
34. Das süsse jubiliren/
35. Das hohe triumphiren
36. Wirdt oft in hohn vnd schmach verkehrt.

    
    

37. Du must vom ehre throne
38. Weill keine macht noch krone
39. Kan vnvergänglich sein.
40. Es mag vom Todten reyen/
41. Kein Scepter dich befreyen.
42. Kein purpur/ gold/ noch edler stein.

    
    

43. Wie eine Rose blühet/
44. Wen man die Sonne sihet/
45. Begrüssen diese Welt:
46. Die ehr der tag sich neiget/
47. Ehr sich der abendt zeiget/
48. Verwelckt/ vnd vnversehns abfält.

    
    

49. So wachsen wir auff erden
50. Vnd dencken gros zu werden/
51. Vnd schmertz/ vnd sorgenfrey.
52. Doch ehr wir zugenommen/
53. Vnd recht zur blütte kommen/
54. Bricht vns des todes sturm entzwey.

    
    

55. Wir rechnen jahr auff jahre/
56. In dessen wirdt die bahre
57. Vns für die thüre bracht:
58. Drauff müssen wir von hinnen/
59. Vnd ehr wir vns besinnen
60. Der erden sagen gutte nacht.

    
    

61. Weil uns die lust ergetzet:
62. Vnd stärcke freye schätzet;
63. Vnd jugendt sicher macht/
64. Hatt vns der todt gefangen/
65. Vnd jugendt/ stärck vnd prangen/
66. Vndt standt/ vndt kunst/ vndt gunst verlacht!

    
    

67. Wie viel sindt schon vergangen/
68. Wie viell lieb-reicher wangen/
69. Sindt diesen tag erblast?
70. Die lange räitung machten/
71. Vnd nicht einmahl bedachten/
72. Das ihn ihr recht so kurtz verfast.

    
    

73. Wach' auff mein Hertz vndt dencke;
74. Das dieser zeitt geschencke/
75. Sey kaum ein augenblick/
76. Was du zu vor genossen/
77. Ist als ein strom verschossen
78. Der keinmahl wider fält zu rück.

    
    

79. Verlache welt vnd ehre.
80. Furcht/ hoffen/ gunst vndt lehre/
81. Vndt fleuch den Herren an/
82. Der immer könig bleibet:
83. Den keine zeitt vertreibet:
84. Der einig ewig machen kan.

    
    

85. Woll dem der auff ihn trawett!
86. Er hat recht fest gebawett/
87. Vndt ob er hier gleich fält:
88. Wirdt er doch dort bestehen
89. Vndt nimmermehr vergehen
90. Weil ihn die stärcke selbst erhält.